Mercado-Estado-Ben Común e Infojobs.

 

    Leer en es                                 Ler en gal.pt

"Yolanda, si quieres hacer un InfoJobs, nosotros sabemos cómo y el nuestro funciona. ¿Hablamos?"

Pois si, este twitt de Infojobs está a dar que falar.

Para quen non o saiba, Infojobs é un portal privado de busca de emprego. Que tamén ten o seu aquel, que para buscar traballo haxa que pagar (a opción premium ou, senón, sufrir a publicidade, ceder datos propios...). É propiedade do Grupo Adevinta¹ a través da súa filial en España, Anuntis-Segundamano, que tamén posúe outros sitios de anuncios clasificados como Fotocasa, habitaclia, coches.net, motos.net e Milanuncios...

Non lles vai mal, como nos contan eles mesmos, especialmente grazas ás canles premium e á publicidade: “Adevinta Spain factura 47 millóns de euros no terceiro trimestre do ano e mellora os resultados de antes da pandemia” dinos na súa páxina²

Pero entendo que non é de negocios do que quere falar infojobs con Yolanda (léase co Estado). Ou si, porque a pregunta é precisamente ¿Que vai pintar unha canle privada de busca de emprego cando exista unha pública?

Ou doutro xeito: Que pasou coas enciclopedias privadas cando apareceu a wikipedia-galipedia? Neste caso había dúas formas de xestionar o coñecemento (que, lembremos, é un Ben Común), unha privada a través do mercado (léase Enciclopedia Británica, Larousse, etc.) e outra vía xestión dese ben común directamente pola sociedade organizada. Gañou a máis eficiente, eficaz e efectiva.

Nestes tempos o mercado ten acaparado moito. Demais. Haille que devolver o protagonismo ás outras formas de xestión das necesidades humanas. Por que estes servizos teñen que ser feitos por empresas que fan negocio cando poden ser servizos prestados por organizacións do Ben Común directamente ou a través das administracións públicas?

Imaxinemos: Wikipedia xestionada como un Ben Común, Portal de Emprego xestionado polo Estado…. Buscadores, Redes Sociais, “Amazóns” (de base local, nacional, estatal, europea...) Spotifys... xestionados dende o público e non dende o negocio.

Unha boa iniciativa do goberno, aínda que, como todas as iniciativas importantes, vai custar esforzo e tempo levala a bon fin.

Porque estas iniciativas tampouco se fan da noite para a mañá.

 Resume: Sociedade Organizada ou Estado a favor do Común contra o Beneficio a toda costa. 

Noutras palabras, o Ben Común contra o Mercado.

Como os científicos surafricanos dos que falaba no post anterior.³

Como as Empresas de Enerxía Municipais que espero comentar no próximo.

1 https://es.wikipedia.org/wiki/InfoJobs

2 https://adevinta.es/news/adevinta-spain-factura-47-millones-en-tercer-trimestre/

3 https://abieito-blog-gal.blogspot.com/2021/12/bens-comuns-e-castigo-vixilancia.html

Bens Comúns e castigo á “vixilancia xenómica” científica.

    ler en pt.gal                                 leer en es

 ©Helena Robledo Muíña/2021

Parto da existencia de catro formas clásicas de afrontar as “Necesidades” nas sociedades humanas.

-Os Mercados, a través da "libre competencia",

-Os Estados (ou administracións), a través do poder,

- As familias, a través do coidado e a reprodución

-A xestión dos bens comúns, a través a organización e a regulación.

Neste momento hai unha "Necesidade", a loita contra a pandemia de Covid-19. Nesta loita maniféstanse tres destes enfoques. Mercados (como Pfeizer e Moderna), Estados (como a Imposición de medidas sanitarias) e Xestión do común (como organizacións científicas organizadas para compartir o seu coñecemento).

No artigo que reproduzo, non se fala exactamente disto, mais si se fala de que "a pandemia destacou que somos unha única comunidade mundial e que a nosa resposta política debe reflectir esta realidade". Este é o ben común que hai que defender, a saúde, a través da loita contra a pandemia dende unha única comunidade mundial.

No artigo si se fala da forma en que os científicos se están organizando para defender ese Ben Común, a “vixilancia xenómica” mediante “un alto nivel de cooperación entre científicos, seguindo protocolos estandarizados de laboratorio e empregando software e bases de datos compatibles” coa maior celeridade posible, o que se ten que facer moitas veces fóra do horario laboral.

E como se di no artigo: "Sería un desastre se a resposta global a esta ciencia heroicamente aberta recompensase a valentía co illamento". Se o Estado só pensase no seu propio beneficio (máis ben o das persoas que o representan) e non no mellor para todos.

E cos mercados, engado eu, pensando tamén só nos seus beneficios, beneficios que se aproveitan descaradamente das nosas necesidades de vacinas, acaparando o traballo extra destes científicos e o de todos os científicos dos centros públicos, quedándose con todo o mérito (e sobre todo, coas patentes) tras facer apenas un último esforzo, emulando a uns "altísimos ananos en ombros de xigantes".

O seu “mercado libre” é impoñer restricións á libre circulación de vacinas, creando así unha “escaseza artificial”, unha actuación que, a maiores, está no cerne da aparición destas variedades.

Ligazón: https://www.eldiario.es/internacional/theguardian/cientificos-detectaron-nueva-variante-merito-hay-asegurarse-no-arrepientan_129_8535652.html